Байдэн замяніў 37 смяротных прысудаў на пажыццёвае зняволенне
Марыя Валодзіна - Vatican News
Як паведаміла 23 снежня 2024 года прэс-служба Белага дома, прэзідэнт Байдэн прыняў рашэнне замяніць на пажыццёвае зняволенне без магчымасці ўмоўна-датэрміновага вызвалення смяротныя прысуды 37 мужчын і жанчын, асуджаных на федэральным узроўні.
У паведамленні адзначаецца, што "змякчэнне пакарання адпавядае мараторыю, уведзенаму адміністрацыяй прэзідэнта Байдэна на федэральным узроўні ў дачыненні да пакаранняў смерцю, за выключэннем выпадкаў тэрарызму і масавых забойстваў на глебе нянавісці”.
Рашэнне прэзідэнта Байдэна было прынята пасля тэлефоннай размовы з Папам Францішкам, якая адбылася 19 снежня 2024 года. Адной з цэнтральных тэм тэлефоннай размовы стала менавіта сітуацыя з асуджанымі на смяротнае пакаранне ў ЗША. Для Францішка гэта важнае пытанне: ён неаднаразова выступаў супраць смяротнага пакарання і заклікаў вернікаў маліцца за вязняў у камерах смяротнікаў у ЗША. Каталіцкі Касцёл ЗША і гуманітарныя арганізацыі таксама актыўна выступаюць за адмену смяротнага пакарання, падкрэсліваючы яго несумяшчальнасць з хрысціянскімі каштоўнасцямі і правамі чалавека.
