Папата: Слушање без осудување е патот до христијанското единство

По повод литургискиот празник свети Андреј, небесниот заштитник на Цариградската патријаршија, папата Фрањо упати традиционална честитка до патријархот Вартоломеј I. На 30 ноември 2024 година кардинал Курт Кох, префект на Дикастеријата за единство меѓу христијаните, го предаде писмото од Светиот Отец до почитуваниот водач на светското православие.

Во него Папата потсетува дека на 21 ноември се одбележа 60-годишнината од декретот Unitatis redintegratio, кој беше усвоен на Вториот ватикански собор и стана официјален влез на Католичката црква во екуменскиот дијалог со другите христијански цркви.

„Нашиот дијалог со Православната црква беше и останува особено плоден“, напиша Фрањо, нарекувајќи го првиот неоспорен плод на „братството што денес се чувствува со особена сила“.

„Сепак, она што Unitatis redintegratio го прогласува како крајна цел на дијалогот – целосно единство меѓу сите христијани кои ја делат истата евхаристиска чаша – сè уште не е постигнато дури ни со нашите православни браќа и сестри. Ова не треба да изненадува, бидејќи милениумските поделби не можат да се надминат за неколку децении“, нагласува тој и повикува да не губиме надеж дека единството меѓу христијаните ќе се оставри во историјата и во разумни временски рокови. „Католиците и православните никогаш не смеат да престанат да се молат и да работат заедно за да бидат подготвени да го примат Божјиот дар за единство“, додаде Светиот Отец.

Папата Фрањо ја потврди желбата на Католичката црква да го продолжи екуменскиот дијалог, што беше потврдено на Епископската синода за синодалност, што неодамна се одржа во Ватикан.

„Атмосферата на вистински и отворен дијалог доживеана во тие денови, без разлика на конкретните одлуки кои произлегуваат од работата на Собранието, веќе е важно сведоштво. Во свет поделен со конфронтација и поларизација, учесниците на Собранието, и покрај тоа што доаѓаат од многу различни контексти, можеа да се слушаат меѓусебно без осудување или критика. Ваквото слушање без осудување мора да биде начинот на кој католиците и православните ќе го продолжат својот пат кон единство“, истакна Папата.

Светиот Отец ја спомена и 1700-годишнината од Соборот во Никеја, чие прослава ќе биде уште една можност да се потврди постојаното унапредување на единството на христијаните „кое веќе постои меѓу оние кои се крстени во името на Отецот и Синот, и на Светиот Дух“.

Ватикан њуз/к.мк

„Постојано ја истакнувам мојата желба да го прославам овој настан со вас и искрено им благодарам на сите кои веќе почнаа да работат за да го овозможат тоа. Оваа годишнина ќе влијае не само на двете древни катедрали кои активно учествуваа на Соборот, туку и на сите христијани кои продолжуваат да ја исповедаат својата вера со зборовите на Никејско-константинополскиот Символ на верата. Одбележувањето на овој значаен настан сигурно ќе ги зајакне веќе постоечките врски и ќе ги охрабри сите Цркви на обновено сведоштво во денешниот свет. Живото братство и сведоштвото на христијаните ќе биде порака и за нашиот свет, кој страда од војни и насилство. Во таа насока, со цело срце се придружувам во вашата молитва за мир во Украина, Палестина, Израел и Либан, како и во сите оние региони каде што се случува она што често го нарекувам „светска војна на делови“, напиша Папата.