Рыцары Калумба перадалі Ватыкану новы трансляцыйны фургон
Марыя Валодзіна - Vatican News
Прэфект Дыкастэрыі па камунікацыі Паола Руфіні падзякаваў за падарунак Рыцарам Калумба, адзначыўшы, што новы камунікацыйны фургон быў падрыхтаваны спецыяльна да Святога года. Ён прызначаны для відэатрансляцыі юбілейных падзей “з Ватыкана, сэрца нашага Каталіцкага Касцёла”.
Вярхоўны рыцар Патрык Кэлі заўважыў, што гэта ўжо чацвёртая мабільная тэлестанцыя, ахвяраваная Ватыкану ордэнам Рыцараў Калумба. Ён адзначыў важнасць распаўсюджвання паслання Святога Айца і Касцёла на ўвесь свет, асабліва ў Юбілейны год.
Кэлі дадаў, што новая станцыя, абсталяваная перадавымі тэхналогіямі, дазволіць данесці голас Папы і юбілейныя падзеі да людзей з усяго свету, у тым ліку і да тых, хто пазбаўлены магчымасці наведаць Вечны горад.
