Ղազախստանը Ազրպէյճանի եւ Պրազիլի հետ կը հետաքննէ Ազրպէյճանական օդանաւի ջախջախումը

Աքթաու քաղաքի մօտ ազրպէյճանական օդանաւային ԱԶԱԼ ընկերութեան օդանաւի ջախջախման պատճառներու հետաքննութիւնը կը վարէ ազգային յանձնախումբը, որուն պիտի մասնակցին նաեւ Ազրպէյճանի եւ Պրազիլի ներկայացուցիչները: Այս մասին կը հաղորդէ Ղազախստանի փոխադրամիջոցներու նախարարութիւնը:

«Ազրպէյճանի Հանրապետութեան քաղաքային թռիչքի պետական գործակալութեան պատուիրակութիւնը, ինչպէս նաեւ ԱԶԱԼ-ի ներկայացուցիչները հասած են Ղազախստան: Տեղւոյն վրայ աշխատանքները կը կատարուին Ազրպէյճանի թռիչքներու իշխանութիւններու հետ սերտ համագործակցութեամբ: Օդանաւ արտադրող «Էմպրաէր»-ի եւ ՍԵՆԻՓԱ-ի (Օդանաւային արկածներու հետաքննութեան եւ կանխարգիլման կեդրոն, Պրազիլ) ներկայացուցիչները նոյնպէս հասած են Ղազախստան», կը նշուի հաղորդագրութեան մէջ:

Այժմ յանձնախումբի աշխատակիցները կը գտնուին արտակարգ դէպքի վայրին մէջ եւ կը կատարեն դաշտային հետազօտութիւններ:

Ղազախստանէն հասած յանձնաժողովի կազմին մէջ ընդգրկուած էին փոխադրամիջոցներու նախարարութեան, Քաղաքային թռիչքներու յանձնախումբի եւ «Քազաերոնավիկացիա» հանրապետական պետական ձեռնարկութեան ներկայացուցիչներ: Յանձնախումբը կը գլխաւորէ Ղազախստանի փոխվարչապետ Քանաթ Պոզումպայեւ:

Վերջինս նախապէս հապճեպ եզրակացութիւններ չէր ըրած արկածի պատճառներուն մասին` նշելով, որ մասնագէտները պէտք է հասկնան զանոնք: Ան ընդգծած է, որ քանի որ օդանաւը արկածի ենթարկուած է Ղազախստանի մէջ, հանրապետութեան իրաւասու մարմինները պիտի հետաքննեն միջադէպը, սակայն անոնք պատրաստ են հաղորդակցիլ այլ երկիրներու գործընկերներու հետ:

Օդանաւը ջախջախուած էր 25 դեկտեմբերի առաւօտեան: Օդանաւին մէջ եղած է 67 մարդ, ներառեալ անձնակազմի 5 անդամներ: Հիւանդանոց տեղափոխուած է 14 մարդ:

Ամերիկացի պաշտօնատար մը «Ռոյթըրզ» լրատու գործակալութեան յայտնեց, թէ նախնական տուեալները ցոյց կու տան, թէ ռուսական հակաօդային պաշտպանութեան համակարգ մը թերեւս վնասած է ազրպէյճանական օդանաւին:

Պաշտօնատարը աւելցուցած է, որ եթէ հաստատուի, թէ ցուցանիշերը ճիշդ են, ապա Ուքրանիոյ դէմ պատերազմին մէջ Ռուսիոյ անպատասխանատու վարմունքը պիտի հաստատէ:

Ազրպէյճանական կառավարութեան աղբիւրները «Եուրոնիուզ»-ին հաստատած են, որ Աքթաուի մէջ ազրպէյճանական օդանաւի ջախջախումը տեղի ունեցած է ռուսական հակաօդային պաշտպանութեան համակարգէ արձակուած հրթիռին պատճառով:

Ըստ աղբիւրներու, հրթիռը արձակուած է 8432 թռիչքին ուղղութեամբ Կրոզնիի վերեւ անօդաչու թռչող սարքի գործունէութեան ժամանակ, եւ օդին մէջ պայթելէ ետք անոր բեկորները հարուածած են ճամբորդներուն ու անձնակազմին:

Կառավարութեան աղբիւրները նաեւ յայտնած են, որ վնասուած օդանաւին չեն արտօնած էջք կատարել Ռուսիոյ օդակայաններուն մէջ, հակառակ օդաչուներու կողմէ արտակարգ վայրէջք կատարելու խնդրանքին: Փոխարէնը անձնակազմին յանձնարարուած է Կասպից ծովուն ճամբով ուղղուիլ Ղազախստանի Աքթաու քաղաք:

Աղբիւրը` Ազդակ