Na Paris, Eklezia na Bulamatari bazali kobongama mpo na bofungoli Notre Dame

Jean-René Bompolonga- Kinshasa

Eloko ya motuya ya molimo mpe ya misala ya ntoki ya art gothique, ndako ya bana bake mpe ya babola, Notre Dame ya Paris ekomi pembeni ya bozui lisusu bongengi mpe ngolu ya sika, sima ya mbula mitano ya moto eye ezikisaki yango ndambo: “Esengo mpe bozangi motema molayi, pamba tè mposa na biso ezali monene ya koyamba lisusu o kati ya bifelo ya cathédrale mokili mobimba” , elobaki mokolo mwa misato Mgr Laurent Ulrich, episkopo ya Paris, o eleko ya bokutani na bapanzi sango na collège des Bernardins. “Nyoso ezali kitoko, nyoso ekotinda na losambo, na kimia, ngonga moko ya bopemi mpo na losambo ya motema mpe ya molimo”, elobaki bongo mokambi ya cathédrale, Mgr Olivier Ribadeau -Dumas.

Office ya bofungoli 7 na sanza ya zomi na mibale

7 mpe 8 ya sanza ya zomi na mibale, mokili ekomona bongo esika wapi mosantu na kitoko bizali kosala se moko. Milulu bikokoba o eleko ya octave moko tii mokolo mwa 15 ya sanza ya zomi na mibale, mpe lisusu tii na Pentecôte na sanza ya motoba ya 2025. Losambo ya bofungoli, ekokambema na episkopo ya Paris, ekosalema na pokwa ya mokolo ya poso 7 ya sanza ya zomi na mibale, liboso ya mokambi ya ekolo ya France, Emmanuel Macron, oyo azua mokano ya botongi lisusu nadako ena na mbula mitano, akoloba moke liboso ya cathédrale, elobaki ndako ya Elysée. Akoloba liboso ya bakonzi ya bikolo misusu, baye nanu bayebani te mpe bato basusu.

Na nse ya ba minda bikongenga, misa ya bofungoli ebongisi bolamusi ya orgue ya monene, loyembo moko, nzembo moko, Magnificat, losambo ya lisanga mpo na mokili mobimba mpe na bolobi Tata wa biso liboso ya bobenisi ya suka mpe Te Deum.

Misa ya bofungoli 8 na sanza ya zomi na mibale

Mokolo elandi, mokolo ya eyenga ya 8 ya zomi na mibale, solennité ya Immaculée conception mpe eyenga ya mibale ya adventi, ekosalema misa ya bofungoli na ngonga 10h30., ekokambema na Mgr Ulrich. Ba episkopo 170 ya France na ya mokili bakozala na misa, kobakisa sango moko ya 106 paloisses ya diocèse ya Paris, mpe sango moko ya moko moko ya ndako Nzambe ya katoliki ya orient. Mokambi ya ekolo France akozala na misa. Bato 2 000 bakozala na kati ya cathédrale o eleko ya mikolo mibale ya bofungoli.

Bandimi bakoki kokota na cathédrale kobanda mokolo ya eyenga ya 8 ya sanza ya zomi na mibale na pokwa, lolenge manaka ebongisami na octave. Mikolo mwambi biye bikoyamba misa ndenge na ndenge ya bato ya Paris mpe na bato bapesaki mosolo mpo na bobongisi cathédrale. Kobanda mokolo ya liboso ya 16 ya sanza ya zomi na mibale, cathédrale ekofungwana mpo na bato banso, lolenge manaka mikopesamela.

Bozongi ya Ngondo ya Mwana

Likambo ya suka ya monene liboso ya milulu nyoso wana, bokutani lisusu kati ya cathédrale na ekeko ya Ngondo ya Mwana, balongolaki yango sima ya moto ya 15 ya sanza ya mineyi ya 2019 na ndako ya Nzambe Mosantu Germain l’Auxerrois. Procession moko ya monene na ba minda ekosalema mokolo ya mitano ya sanza ya zomi na moko mpo na bolakisi bozongi ya Ngondo na Notre- Dame kino liboso ya cathédrale. Emonanaki mobimba tango mabanga bipanzanaki na nse, ekeko ya Ngondo ya Mwana ekomaki, sima ya moto, “Ngondo azali ya kotelema”, Stabat Mater, ekomaki elembo ya libondi mpe ya elikia. Ezali epayi ya ekeko eye ngongi Paul Claudel abongwamaki, o eleko ya Mbotama ya 1886.