Audience générale : Elimo ezali liziba ekobimisa elikya na biso

Jean-René Bompolonga- Kinshasa

Lelo mokolo ya misato 11 ya sanza ya zomi na mibale, Papa François asukisi molongo ya malongi na oyo etali Elimo na Eklezia, eye mama ya likambo ewuti na moko ya milongo ya suka ya Emoniseli “Elimo na mwasi balobi ‘yaka’”. “Mpo na nani liloba ena etindami?”, Mosantu Papa atunaki, apesi lisusu eyano elongobani. “Na Kristu asekwi”. Na yango, François alimboli, “mingi na santu Polo to Didake (…) balobi ete, na masanga ya losambo ya bakristu ya liboso, eyokanaki na araméen lolaka “Marana tha”, oyo elingi koloba “Yaka, Mokonzi”

Mbela ya Kristu asekwi

Papa asemboli ete “o eleko ena ya kala, kobelela ezalaki na eloko moko tokoki kobenga lelo eschatologique”,  pamba tè ekobaki ye, ezalaki koloba “bozeli makasi ya ya bozongi na nkembo ya Mokonzi, ya ‘parousie’”. Mosantu Papa atalisi ete “lolaka na bozeli lingaki koloba bibungi te na Eklezia”. Pamba tè lelo lisusu, tango “ya misa, sima ya kosantisa nzoto ya Kristu (…) liwa na nsekwa ya Krsitu”  esakolami “na bozeli boyei na ye”.

Bozeli moko ya boyei ya Kristu, elobaki Papa, eye “esangisani lokola na bozeli ya boyei ya eleko inso na lolenge Eklezia ezali lelo mpe elotambola”.

Mpo na François, mbela ena ya Eklezia «Yaka» esosolami lokola mbela ya Elimo-Santu. Pamba tè, “Kristu na Elimo- Santu bakabwanaka te na oyo etali libiki”. “Elimo-Santu ezali liziba ekobimisa tango inso elikya ya mokristu”, elobaki ye, na botangi bongo santu Polo lolenge eye: “Tika ete Nzambe ya elikya atotindisa bino na esengo na ye nyoso mpe na boboto na boyambi, mpo ete elikya na bino na nguya ya Elimo-Santu eleka”.

“Soki Eklezia ezali lisuwa, Elimo-Santu ezali elamba eye ekoningisa ye mpe ekotambuisa na ebale ya lisapo, lelo lokola lobi”     

Elikya, koleka maloba

Mosantu Papa andimi ete “elikya ezali liloba moko ya pamba te, to mposa moko boye mpo ete makambo bikende malamu”, “ezali likambo ya solo, pamba tè etongami na boyengebene ya Nzambe na bilaka na ye”, elakisi ye. Na yango “elikya ebengami vertu théologale”, alimboli Papa François. Pamba tè, “efulami na Nzambe mpe azali na Nzambe lokolo mobateli”, elobaki ye.

Akobaki koloba ete elikya “ezali ezaleli moko ya bongo bongo te, eye ekozelaka makambo bikoma”, kasi “ezaleli moko ya mosala makasi eye ezali kosala mpo ete bikokisama”. Mpo na wana mokitani ya santu Petelo amoni ete “mokristu esengeli asepela kaka na elikya te, asengeli kotabwuisa yango, azala moloni ya elikya. Ezali likabo monene Eklezia ekoki kosala na mokili mobimba, mingi na bileko biye wapi nyoso ezali kotinda ya kolembisa bilamba”, alobaki Mosantu Papa.  

Bopanzi nsango elamu, mingi na makasi ya maloba te kasi na bolingo       

Apostolu Petelo, elobaki Mosantu Papa, azalaka kolendisa bakristu ya liboso lolenge boye: “Bokumisa Mokonzi, Kristu, na mitema na bino, tango inso bobongama ya koyanola na moto oyo akotuna bino na oyo etali elikya ezali na bino”, na bongo elobi François, abakisi likanisi moko: “Nzokande, bosala yango na pete mpe botosi” (1P 3, 15-16). Mpo na episkopo ya Roma, maloba mana bizali koloba “lolenge ya bopanzi nsango ya liboso mpe ya makasi”. Pamba tè amonisi ete “ezali mpenza makasi ya maloba te ekosala ete bato bandima, kasi bolingo tokoki kotia na kati”.

Ekomi ye na suka ya malongi, Papa François abondeli ete “Elimo asunga biso tango inso” mpo “totonda na elikya na bokasi ya Elimo- Santu”