Bilenge ntuku mibale ya sika bazui mosala ya kopesa toli na Eklezia na mokumba na ye
Mokolo ya zomi ya sanza ya zomi ya mobu nkoto mibale na ntuku mibale na minei, bilenge ntuku mibale ya sika baponamaki mpo na bozali na Conseil consultatif international ya elenge. Bakutanaki na Roma mpo na mbala ya liboso, mpo na koyeba mokumba ena ya sika ya Eklezia, lokola Sally Yasmine, moko ya conseil ena, alimboli.
Jean-René Bompolonga- Kinshasa
Bazali bilenge ntuku mibale bawuti mokili mobimba mpe bazui mosala ya kopesa toli na Eklezia. Conseil consultatif international ya elenge (to IYAB lokola International Youth Advisory Board) esalemi na mobu 2018, na suka ya synode ya bilenge, na kati ya dicastère ya ba laïki, libota mpe bomoi.
Conseil ya sika
Lisanga ya yambo ya mosala esali kobanda mobu 2020 kino 2023 na misala ya Eklezia matali bilenge, mpe lisanga mosusu ya sika eponamaki na sanza ya zomi. Bakutanaki mbala ya liboso na Roma kobanda mokolo ya zomi kino ya zomi na misato ya sanza ya zomi na mibale. Moko na bango, elenge mwasi Sally Yasmine, mwana ya ekolo Canada awuti ekolo Liban, alobaki esengo na ye ya kozala wana: “ezali mokano ya Nzambe, na kolikya ete nakokoka”.
Akosala mpo na Eklezia Katoliko na Canada, lokola mokambi ya contenu medias sociaux mpo na Sel + Lumière Media, mpe epayi ya archidiocèse ya Montréal. Bokutani eye ya yambo, ekolandama na misusu ebele na visioconférence, esali ete “tofungola mbula misato bizali koya”, elimboli ye. “Tozui konzo ya kosolola moke na mokumba mpe vision, ya koyeba nini tolingi kobongisa. Tozui ngonga ya kolota, ya kolota lisanga na lolenge ya kosolola na Elimo”.
Bokutani na Papa François
Bilenge bazui ba visites ebele na Roma, mboka mwinda mpo na Eklezia Katoliko, mpe bazui libaku ya bokutani na episkopo na ye, Papa François. “Ezali eleko moko ezali na ntina mpo na ngai moko, etatoli Sally Yasmine, mpe alobi na biso mpo na ntina monene ya kozala molende mpe yo moko”.
Mbula mitano sima ya kobima na yango, exhortation apostolique Christus Vivit ya Papa François ezali kokoba kotambola mpe kopesa likanisi na mosala ya bilenge,baye bazali lobi ya Eklezia te, kasi ya lelo na ye, lokola Mosantu-Papa akomaka.
Ba nzela mpo na Eklezia katoliko
Elenge azali na mosala ya bosololi alobi ete “kosala mpo na Eklezia ezali eloko malamu eye ekomi na bomoi na ngai” mpe azali na esengo ya kokanisa mpo na mokumba na yango ya bopanzi nsango elamu eye azali kosala na mosala na ye na bilenge basusu ya mokili mobimba, mpo na kopesa banzela ya mosala na Eklezia katoliko.
Sally Yasmine akani kokabola eye ye amoni na Roma mpe ebandeli ya mosala na ye na masanga ya bilenge ya Canada, liboso ya kozonga na Roma na suka ya sanza ya sambo mpo na jubilé ya bilenge.
16 December 2024, 14:21
